بسم الله الرحمن الرحيم
إخواني الكرام السمكاوية
مكنتش عارف افيدكوا بإية لاني لقيت ان انتوا عارفين كل حاجة
فقلت اقولكوا عن تجربتي الشخصية .....عمل مزرعة سمك (صغيرة) في المنزل .
في الاول أحب اعرفكم ان انا عملت أخطاء كتييير في موضوع المزرعة دة –مع اني كنت سمكاوي قديييم .. فا متقلقوش
المهم في الاول قبل متعمل أي حاجة عايزك تدرس السوق يعني إية ؟
الاول لازم تكون تعرف تجار و تكونوا أصحاب كمان ... (علشان تلاقي حد يشتري السمك—بسعر كويس)
اثنين عايزك تاخد ورقة و قلم و تنزل علي سوق الجمعة (طبعاً دة في مصر) او اي سوق كبير للسمك
تشوف اية السمك إلي موجود و تشوف الاسعار كام ( انا عملت كدة ) علشان محدش يضحك عليك و خالي بالكم الاسعار بتتغير تقريباً كل اسبوعين ....
دلوقتي احنا عرفنا السوق ماشي ازاي ....
نيجي نجهز المزرعة و دة مش هيبقي صعب عليكم .....
قبل ما نجهز نشوف احنا هنفرخ اية , علشان مش كلو زي بعضه ,.
انا بنصح في الاول بلاش تفرخ , ممكن تسمن (تشتري السمك صغير قوي _زريعة_ و تكبرة و تبيعة بفرق السعر)
لو عايز تسمن
بلاش فانتل _ بيستهلك أكل كتير جداً _ و هتلاقي نفسك خسران في الاخر .
الانجل كويس ( في التفريخ و التسمين )
الكات فيش (متنفعش في التسمين نمو بطئ سعر متدني ) بس انا كان الكات فيش اختصاصي لانوا كويس في التفريخ
عائلة الولاد كلها كويسة في التفريخ
عموماً السمك الرخيص مينفعش في التسمين . لان انتا بعد ما تكبرة فرق السعر هيبقي صغير قوي او معدوم
في مرة جبت سمك (سلفر شارك ---- رد تيل شارك ) من تايلند حوالي 180 سمكة بــ700 جنية 3 سم تقريباً سمنتهم لحد 6سم في ثلاث شهور و بعتهم بـــ2000 جنية .
عموماًالاحسن تفرخ نوع واحد بكميات عن انواع كتير بكميات قليلة ( علشان التجار مش هيشتروا كميات قليلة ) .
الاحواض
الحقيقة ان انا بدأت المزرعة بحوض (70) و حضانة , و الحمد لله دلوقتي عندي 4 أحواض (متر) و 6 أحواض (60).
و كان عندي محل .
فا عدد الاحواض ميهمش (واحد واحدة) ( علي الاقل حوض كبير 70 فيما فوق) و حضانة (زجاج مش بلاستك و تقريباً 30 في 25) و كانت بــ20 جينية
بس كل ما كان عندك أحواض كتيير كل ما الانتاج زاد .
و السمك بيكبر اسرع في الاحواض الكبيرة
تجهيز الاحواض
1-مفيش جرش (حصي) في القاع لان مع الاعداد الكتيير الحوض هيتوسخ بسرعة و دة هيسهل التنضيف
2-ماتور هوا قوي و ياريت تعملوا علي الاقل (3وصلات) في الحوض علشان السمك هيبقي كتتير و ممكن يتخنق (حصلتلي قبل كدة) .
3-مش مهم الادوية _السمكة إلي تعيا اعزلها و زود الملح مخفتش ارميها علشان الدواء هيزود التكاليف (إلا إزا كانت سمكة غالية)
4-سخانات و يريت تبقي ترموستات (علشان ميحصلش أي خلل في درجة الحرارة يخلي السمك يعيا )
5-فلاتر مهمة بس احنا مش هنجيب فلاتر كهربا (غالية) هنجيب فلاتر هوا (تعمل بضغط الهواء) 2 في الحوض الواحد علي الاقل .
6-الاضاءة نوعاً ما مش مهمة (معظم السمك يفضل التفريخ في الظلام) ....بس انا بحتجها علشان نظري ضعيف .
بس كدة وياريت مكنش نسيت حاجة .
تجهز أحواضك (درجة حرارة _مية , متستعملش مزيل الكلور يسبب مادة جيلاتينة علي خياشيم السمك الصغير اترك المياة حوال 3 أيام حتي يتبخر الكلور منها , أفضل –وصلات الهواء – الفلاتر)
تتأكد ان كلة تمام تروح تجيب السمك سواء التسمين او التفريخ .
و طبعاً كلنا عرفين لما تجيب السمك متحوطهوش في المية علي طول _حوطه بالكيس علي وش المية علشان يأخد درجة الحرارة ... و بعد شوية 20 دقيقة تبدأ تحط مية من الحوض للكيس علشان درجة الاتش بي .
التسمين : الحوض المتر ياخد حوالي 80 سمكة من الانواع الكبير أو 120 سمكة من الانواع الصغيرة
التفريخ
شوف في المنتدي هتلاقي كل حاجة عن التفريخ
و فرخ السمك إلي يعجبك.
الاكل
(محرم عليك الاكل المجفف ) دووود فقط
و إلا مفيش تسمين او تفريخ .
البيع
لازم السمك يكون شد حيله (عمر شهر و نصف علي الاقل )
و تكون متفق مع تاجر علي السمك من قبل ما تجيبة اساساً...(انا عملت كدة)
و متخليش حد يضحك عليك انتا دارس السوق و عارف الاسعار كلها ..
اة حاجة تانية و انتا بتحط السمك في أكياس علشان تبيعة الهواء يكون تلتين الكيس مش العكس و إلا السمك يتخنق.
حاجة تانية....همممم...مش عارف ...المهم لو حد عايز مساعدة انا في الخدمة (علي قد علمي طبعاً)
0 التعليقات: